LEGAZPI CITY- Naglunsar na nin contact tracing an Catanduanes Provincial health Office katabang an Department of Health (DOH) asin Inter-Agency Task Force on Emerging Infectious Diseases para sa mga nakaibanan ni Governor Boboy Cua asin agom na si Nancy Cua.

Kasuodma kan inanunsyo kan gobyernador sa paagi nin sarong kasuratan na pigpost sa social media na nagpositibo siya asin an agom sa coronavirus disease alagad nakaeksperyensya man sana nin mild symptoms kan COVID 19.

Sa ngunyan naka-quarantine an mag-agom mantang nagsairarom naman sa antigen test an mga kaparientes kaini na anas man negatibo an resulta.

-- Advertisement --

Sa intrevista kan Bombo Radyo Legazpi kay Catanduanes Provincial health Officer Dr. Hazel Palmes, ngunyan na aldaw magsasagibo nin disinfection sa kapitolyo asin sa iba pang mga pampublikong establishimento na dinuman kan gobernador ngani na maibitaran an paglakop pa kan nakakalakit na helang.

Pighahanap naman an mga nakaibanan kan opisyal sa nakalihis na mga aldaw ngani na maisairarom sa test asin makumpirmar kung naolakitan kan helang.

Enot naman na inasegurar ni Governor Cua na dagos man giraray an saiyang pagtatrabaho maski na naka-quarantine asin sinugo na an mga personahes para sa gigibohong trabaho mantang nagpaparahay pa sa COVID 19.