-- ADVERTISEMENT --
Photo © Google Images

LEGAZPI CITY – Nagpagirumdom nin labing paglikay kun nagbibiyahe sa tinampo an mga otoridad makalihis an nangyaring aksidente sa Sitio Basud Brgy. San Rafael, Guinobatan, Albay.

Imbwelto digdi an motorsiklong pigmamanehar kan 17-anyos na menor de edad asin backride na si Clark Realo, 18-anyos na anas residente kan Brgy. Maguiron sa kaparehong banwaan.

Sa intrevista kan Bombo Radyo Legazpi ki P/Maj. Wilfredo Espineli, hefe kan Guinobatan Municipal Police Station, pigbabaybay kan nasabing motorsiklo an Maharlika Highway pasiring sa ciudad kan Ligao hale sa banwaan kan Camalig.

Alagad sa pag-abot sa nasabing parte kan tinampo partikular na sa pig-iirahay na Basud Bridge , tuminama an motorsiklo sa signage o early warning device na nagresulta tangarig na mawaran nin kontrol an driver asin mahulog sa 30 pie na tulay.

Tuminama asin nahulog sa gapo an payo kan driver na dinara sa ospital alagad ipigdeklarar na dead on arrival mantang nahulog man sa tubig an backride na nagsapar nin minor injury.

-- ADVERTISEMENT --

Pig-aaram pa man kun pira an aabuton kan naraot na motorsiklo.

Napag-aramang wara man na mga barandilya o ulang sa nasabing tulay huli sa nagpapadagos na konstruksyon.