LEGAZPI CITY- Hagad sa ngunyan kan sarong Bicolanang nakasabay sa flight haling Dubai na may nagpositibong COVID 19 UK variant na mapundo na an mga nareresibing diskriminasyon lalo na kan saiyang mga kaparientes.

Sa intrevista kan Bombo Radyo Legazpi sa Overseas Filipino Worker sa Jordan na binisto sana sa alyas na Ana, Enero 7 suboot kan makaabot siya sa Manila sakay nin connecting flight haling Dubai na EK332.

Paglapag sa Ninoy Aquino International Airport (NAIA) tulos man suboot sindang sinabat kan mga personahes kan Philippine Coast Guard asin dinara sa sarong hotel sa Muntinlupa lunad nin bus ngani na magsairarom sa 14 aldaw na quarantine asin swab test.

-- Advertisement --

Segun kay Ana, sa hotel na ninda naaraman na saro sa mga nakaibanang Pinoy sa nasabing eroplano an nagpositibo sa bagng variant kan coronavirus disease na pigsasabing mas nakakaolakit.

Alagad pigkakamundo kan OFW an nagluwas na bareta sa social media na garong nagluluwas na nakauli na siya sa Bicol asin nagpositibo sa nakakolakit na helang rason nganing makaresibe nin mga diskriminasyon an saiyang pamilya.

Nilinaw ngunyan ni alyas Ana na bako totoo an nagseserkular na impormasyon sa social media huli ta negatibo man an resulta kan saiyang swab test mantang nagtitinir pa sa Manila para sa duwang aldaw na natatadang quarantine kung kaya wara nin dapat na ikahandal an mga kababayang Bicolano.

Magigirumduman na kan nakalihis na semana kan magluwas an sarong memo sa Facebook na nagsusugo para sa pagsasagibo nin contact tracing sa mga nakaibanan kan nasabing OFW na positibo suboot sa COVID 19 UK variant rason nganing mahandal an mga Bicolano, alagad fake news man palan.