LEGAZPI CITY- Nagpuon na ngunyan na aldaw an sarong semanang granular lockdown para sa 41 mga barangay sa banwaan nin Guinobatan na mahaloy hasta sa Oktubre 21.

Sa intrevista kan Bombo Radyo Legazpi kay Guinobatan Mayor Gemma Ongjoco, ipinaotob an lockdown base naman sa abiso kan Municipal Inter-Agency Task Force huli sa marikas na naglalangkaw na kaso nin COVID 19 sa lugar.

Solamenteng an mga barangay sana kan Batbat, Balolo asin Pood an dae kasabay sa lockdown huli ta wara nin naireport na kaso nin COVID 19.

Istriktong pinagbabawal an pagluwas kan mga residentes sa saindang harong, kung sain saro sana an pwedesir na magbakal kan mga importanteng bakalon na dapat na may quarantine pass.

Maglilipot man an mga barangay officials nganing sitahon an mga madadakop na magbabayolar sa kasuguan na posibleng matawanan pa nin panelidad.

-- Advertisement --

Pangapudan kan alkalde sa mga residentes na magsunod na sa kasuguan nganing magbaba an kaso nin COVID 19 sa banwaan asin dae naman kaipohanon pang i-ekstindir an granular lockdown.