LA UNION – Ipan-pannakkel ni PLT Clinton Amawan, Officer-in-Charge iti Pugo Police Station, iti inyuswat da a proyekto itay laeng nabiit, nga inawagan da ti YAPAK, wenno Yaman ken Ayat ti PNP Pugo Agpaay iti kakadwa para iti Kapya.

Iti ekslusibo nga interview ti Bombo Radyo La Union kenni Lt. Amawan, inyuswat da ti YAPAK idiay Barangay San Luis, Pugo ken nangisagut da iti 12 a pares ti sapatos kadagiti barangay tanod.

-- Advertising --

Nangipaay pay dagiti pulis iti libre a pukis, nagpakan, ken clean-up drive.

Kinuna ti opisyal a tarigagay da a maipaayan ti libre a sapatos iti amin a force multipliers iti nasao nga ili, partikular dagiti barangay tanod a katulongan dagiti otoridad iti panang-mantinir iti urnos ken kapya nangruna nu adda dagiti events ken uray iti panagresponde iti kangitingitan ti COVID 19 pandemic.

Innayon pay ni Lt. Amawan a naggapo a mismo iti bulsa da a pulis iti kuwarta a pinaggatang iti sapatos.

Inton Hunyo 2, mangisayangkat manen ti Pugo PNP iti YAPAK program ken 12 manen a pares ti sapatos iti isagut da kadagiti barangay tanod.