LA UNION – Nagpaut iti aganay dua nga oras iti inaramid a refloat wenno panangiya-un dagiti expert divers ken floating assets ti Phil. Coast Guard (PCG) iti debris ti bimtak a trainer aircraft iti kabaybayan idiay Wenceslao, Caba, La Union idi malem kalman, May 26.

Iti eksklusibo a pannakiuman ti Bombo Radyo La Union kenni Philippine Coast Guard La Union Commander Alois Morales, kinuna na nga alas 8:00 itay bigat a rinugyan da iti operasyon a panang-refloat dagiti nasina-sina a paset ti aircraft, kangrunaan na iti main body daytoy.

-- Advertising --

Segun kenni Morales, balligi iti insayangkat da a refloat ken saan unay a narigatan dagiti divers agsipudta saan met unay a nauneg iti nasao a paset ti kabaybayan a nakapasamakan ti insidente.

Kinuna na a mapatta-patta a 30 feet iti kauneg iti paset ti baybay a nagsuwekan iti aircraft ken nakatayan ti makunkuna nga student pilot a ni Mark Irvin Marcelo Sabile.

Kabayatanna, iti bangkay ni Sabile ket naiyawid metten iti lugar da idiay Apalit, Pampanga.

PCG La Union Commander Alois Morales