-- ADVERTISEMENT --

LA UNION – Nangiyatnag a dagus iti notice of violation ti Department of Trade and Industryu (DTI) La Union Provincial Office kontra ti maysa a pagtagilakuan ti unbranded christmas lights idiay syudad ti San Fernando, La Union.

Daytoy ket kalpasan a nangisayangkat ti inspeksyon ti DTI La Union Enforcement Team a kadduada ti San Fernando City Fire Station ken ti representative ti consumer group.

Iti interview ti Bombo Radyo La Union kenni DTI La Union Provincial Director Merlie Membrere, kinunana a panggep ti naisayangkat nga inspeksyon nga ipanamnama nga addaan ti PS mark wenno ICC stickers dagiti mailaklako a produkto, kangrunaan dagiti Christmas decorations a de-kuryente.

Sigun kenni Membrere, tarigagay pay ti ahensya a mailiklik iti peggad iti biag ken sanikua dagiti aggatgatang kadagitoy manipud iti uram.

Kabayatanna, iti nasao nga inspeksyon ket agbalor iti P1,500 dagiti alikamen a nakompiskar ti DTI gapu iti saan a panangsurot ti aglaklako iti pagannurutan a maipatpatungpal.

-- ADVERTISEMENT --