LA UNION – Kinumpirma ti Philippine Statistics Authority (PSA) Regional Office-1 a maituloyen iti proseso ti panagparehistro para iti Phase 1 ti National ID ti Ilocos Region kalpasan a temporaryo a naisardeng daytoy idi Disyembre 30, 2020.

Iti pannakiuman iti Bombo Radyo La Union kenni Atty. Sheila De Guzman, Regional Director iti PSA Regional Office-1, kinunana a ti panangituloy iti panangiproseso kadagiti National ID para kadagiti taga Ilocos Region ket maipangruna dagiti saan pay a nairaman nga agparehistro.

Adda iti tallo nga addang ti panagparehistro iti National ID a ti step 1 nga isu pay laeng iti ayan ti Ilocos Region ket iti panangammo ti demographic information dagiti residente kas iti person’s full name, date of birth, place birth, blood type, address, Filipino or resident alien, marital status (optional), mobile number and email address.

-- Advertising --

Iti maikaddua ken maikattlo nga addang wenno steps ket iti biometric information a pakairamanan iti front-facing photograph, full set of fingerprints ken iris scan.

Idi Oktubre 12, 2020 a nangrugi ti Phase 1 iti panagparehistro iti National ID a naglippas idi Disyembre 30.

Iti pannakaituloy ti registration process ket tapno mairaman iti adu pay a residente manipud kadagiti probinsya ti Ilocos Sur, La Union ken Pangasinan.

104% wenno kaibatugan iti 798,000 nga indibidwal ti average dagiti nadakamat a probinsya ti nasken a mailippas tapno maisaruno a marugyan ti panangiproseso iti registration para kadagiti agindeg ti Ilocos Norte.

Ita a bulan ti Enero 2021 nga ikagumaan nga ilippas ti PSA iti phase 1.

Impaganetget ti PSA a napateg ti panagparehistro iti National ID gapu ta agserbi daytoy a pakabigbigan ti maysa nga indibidual ken maaramat a kangrunaan a dokumento tapno mapalag-an iti transaksyon ti gobyerno ken iti dadduma pay a pribado nga opisina.