LA UNION – Inladawan ni Marilyn Espiloy nga asawa iti maysa kadagiti dua nga agkabsat a natay kalpasan a ma-suffocate iti uneg ti bubon idiay Barangay Lisqueb, ili ti Bacnotan, La Union maipapan inaramid a rescue operation dagiti kaarrubada ken dagiti otoridad.

Iti pannakiuman ti Bombo Radyo kenni Marilyn, kinunana panggep dagiti agkakabagyan a karasan ti nasao a bubon ket ti biktima ken bayawna a ni Fredie Espiloy iti immuna nga immuneg ti abot ngem nagkedked daytoy nga agpaigalot ti siketna.

-- Advertising --

Simrek ni Fredie iti bubon babaen ti panagbatayna iti balde ken nagkapet iti tali.

Idi a makaunegen iti bubod ni Fredie ket pinukkawanna dagiti kakabagyanna nga iyaon daytoy gapu ta marigatan isuna nga umanges.

Kabayatan a maingatngato ni Fredie ket nakaibbat daytoy iti nagkapetanna a tali isu a natinnag isuna iti bubon.

Sigun kenni Marilyn, posible a napukawan ti puot ti bayawna isu a nakaibbat daytoy.

Dagus met nga immarayat ti asawa ni Marilyn a ni Federico a isemrek iti bubon.

Maipagarup a napukawan met laeng iti puot ni Federico idi a nakaunegen daytoy iti bubon tapno arayaten ti kabsatna.

Gapu iti daytoy, nagdanag dagiti agkakarruba isu a nagpaarayatda kadagiti kameng ti pulisya ken Municipal Disaster Risk Reduction and Management Office ti nasao nga ili.

Imbatad ni Marilyn nga uray dagiti timmulong nga otoridad ket narigatan ken nabayagan met tapno maiyaon dagiti bikitma.

Naiturong idiay Bacnotan District Hospital dagiti agkabsat nga Espiloy ngem saanen a naisalbar pay iti biag dagitoy.

Malamayan iti bangka dagiti biktima iti pagtaenganda ti nasao a barangay.