LA UNION – Umabuten iti P83.9 million ti tulong-pinansyal a naipaay kadagiti hograisers nga apektado iti African Swine Fever (ASF) iti Ilocos Region.

Naammuan ti Bombo Radyo manipud iti Department of Agriculture (DA) Regional Office-1, manipud iti nasao a gatad ket P53,030,000 ti naipaayen para iti Indemnification Program wenno iti P5,000 a cash assistance para iti tunggal baboy a naipasidong iti culling.

Malaksid iti indemnification, P30,916,160 met a balor iti 762 a dinguen kas iti baka, ken 3,352 a free range chickens ti naited a kas paset ti Recovery Plan dagiti apektado a hog raisers.

-- Advertising --

Aminado ti DA a dakkel a karit ti pannakaisayangkat ti culling gapu ta adda dagiti agtagikua iti baboy nga agkedked a mangisakripisio kadagiti tarakenda uray no asideg kadagiti apektado ti ASF.

Kas sungbat iti ahensya, nainget iti validation kadagiti maatap a nakaptan iti ASF ken naipanamnama a maipaayan iti tulong dagiti maapektaran a hograisers.