Aganay P120,000 pesos ti danyos iti nauram a pagtaengan idiay Barangay Salcedo, Luna, La Union itay bigat.

Iti pannakiuman kenni Senior Fire Officer 4 Rodolfo Castillo, chief ti Luna Bureau of Fire Protection, ti nasao a pagtaengan ket kukua ni Elena Nacionales, 74, balo ken residente iti nasao a lugar.

Segun kenni Castillo, alas 9:10 itay bigat idi naidanon kadakuada ti nasao a pasamak a dagus met dagitoy a nirespondian numan nangaton ti apoy idi makasangpetda.

-- Advertising --

Gapu iti dayta, kiniddawda ti tulong manipud iti Balaoan Bureau of Fire Protection ken naideklara a fire out ti uram alas 9:44 itay bigat.

Maibasar pay iti imbestigasyon dagitoy, ti two storey house ket naaramid iti semi concrete.

Kabayatan na, segun pay kenni Castillo, saan met a paglibakan iti miembro ti pamilya a gapu iti kinakabaw ket maipagarop a saan na nalagip iti nakaidiswan iti rung-rong na ket napasamak iti insidente.