SAN FERNANDO CITY, La Union – Saan pay laeng a naatiw iti panangiggem kadagiti agkakangato a posisyon kas nabotosan nga opisyal iti probinysa ti La Union iti pamilya dagiti Ortega.

Agtalinaed iti posisyonna kas mangidadaulo ti probinsya ni Governor Emmanuel “Pacoy” Ortega III kalpasan a mabotosan manen daytoy ti gubernatorial race, kabayatan a bise-gobernador met ti pangamaenna a ni Mario Ortega.

Ti unopposed congressional candidate a ni incumbent 1st District La Union Representative Pablo Ortega a pangamaen met laeng ti gobernador ket agtalinaed iti pwestona idiay Kamara.

-- Advertising --

Ni incumbent San Fernando City Councilor Paolo Ortega a putot ni Rep. Pablo ket nabotosan met kas provincial board member iti Umuna a Distrito ti probinysa, kaddua ti kasinsinna a ni Jay Jay Orros.

Ti ub-ubing met a kabsat ni Gov. Pacoy a ni incumbent San Fenando City Vice-mayor Alf Ortega ket nabotosan manen kas bise-alkalde ti syudad kalpasan nga awan ti naggandat a limmaban kenkuana iti eleksyon, kabayatan a nangabak met kas city councilor ti pangamaenda a ni Monetski Ortega kaddua dagiti kasinsinda nga isuda Luzan Ortega-Valero ken John Orros.

Idiay ili ti San Juan, landslide victory met ni Mannix Ortega ti ub-ubing a kabsat ti gobernador kas bise-alkalde, kabaytan a nabotosan met kas konsehal ti ili ni Mariquita Ortega nga asawa ni Rep. Pablo.

Iti laksid a nabotosan ti naduma-duma a posisyon iti gobyerno ket adda met dagiti napaay a kameng iti pamilya Ortega.

Naabak iti mayoralty race ti dua a kabsat ni Rep. Pablo nga isuda Pepe Ortega idiay syudad ti San Fernando ken Kit Ortega idiay ili ti Luna.

Napaay met ti kaanakan ti kongresita a ni Michelle Ortega-Pimentel a magun-od ti posisyon kas alkalde iti ili ti Caba.

Agassawa iti politika

Iti kalkalpas nga eleksyon ket namnamaen nga idaulwan dagiti agassawa iti sumagmamano nga ili idiay La Union.

Idiay ili ti Bacnotan ket naminsan manen a nabotosan kas alkalde ni incumbent Mayor Francis Fontanilla ken kadduana a mangidaulo ti ilida ti asawana a ni Vice-mayor elect Divine Fontanilla.

Idaulwan met iti agassawa a Mayor elect Herminigildo Velasco ken incumbent Mayor nga ita ket Vice-mayor elect Divina Velasco iti ili ti San Gabriel.

Ti met agassawa nga incumbent Naguilian Municipal Mayor nga ita ket Vice-mayor elect Reynaldo “Bobot” Flores ken Mayor elect Nieri Flores ket imatunanda ti munisipyo.

Idiay ili ti Caba naminsan manen a nabutusan kas alkalde ni incumbent Mayor Philip Crispino, kabayatan a nangabak met kas konsehal ti asawana a ni Donna Crispino.

Kabayatanna, sublaten met ni Dra. Menchie de Guzman iti pwesto ni incumbent Mayor Martin de Guzman III kalpasan a mabotosan daytoy kas alkalde iti ili ti Bauang.