LA UNION – Sinuspinde ti Sangguniang Panlungsod iti operasyon ti Private Motor Vehicle Inspection Center (PMVIC) ditoy syudad ti San Fernando, epektibo idi kalman Enero 26, maiyannurot iti impasa a resolusyon dagiti miyembro ti konseho nga indaulwan ni City Vice Mayor Alf Ortega.

Immuna ti daytoy ket nagtaripnong dagiti mangbukbukel ti Committee on Transportation and Traffic Management ti city council kadwa da iti maysa a mangibagbagi ti LTFRB Region 1, tapno solusyunan iti parikot dagiti motorista maipapan iti nangato a babayadan iti emission testing dagiti behikulo.

Nagresulta daytoy iti panang-suspinde iti PMVIC operation tapno maipaayan ti naan-anay a gundaway dagiti maseknan nga opisyal a mangadal ken mangamiris iti basaran dagiti allagaden iti linteg.

-- Advertising --

Kabilang ditoy iti reklamo dagiti drivers ken operators a nangato a singir iti inspection ken re-inspection fees, a kanayunan a parigat kadagiti motorista laksid iti sangsangwen a pandemya.

Maikadwa, nakita ti komite a nalabsing ti PMVIC iti Section 19 iti LTO Memorandum Circular No. 2018-2158, a dagiti reklamo ken arungaing dagiti customers maipapan iti implementation ti motor vehicle inspection system (MVIS) ket nasken a matratar ken maaksiyunan a dagus.

Maikatlo, nasken a maipaayan iti panawen dagiti maseknan nga opisyal iti lokal a gobyerno a mangisayangkat ti inspeksiyon ken obserbasyon kadagiti pasilidad ken personnel ti PMVIC, nu pangnamnamaan met laeng dagitoy wenno makaited da iti napintas a serbisyo kadagiti customers.