-- ADVERTISEMENT --

Madama a maag-agasan iti maysa a pribado a pagagasan maysa a negosyante kalpasan isuna a pinaltogan ti maipagarop a riding in tandem suspek idiay Barangay Butubot Oeste, Balaoan agarop alas 6:45 itay agsapa.

Nabigbig ti biktima a ni Alejandro Casiano Jr, 41, addan asawa, residente ti nasao a lugar.

Iti pannakiuman ti Bombo Radyo La Union kenni PSSgt Rodel Licudan, imbestigador ti Balaoan Police, nagturong ti biktima iti balay ti managan Rodolfo Acosta tapno katungtungen dagiti dua a lallaki a madama idi nga agkapkape idi a kellaat laengen a nakangngeg ti kanalbuong dagiti adda ti aglawlaw kasaruno ti pannakapaltog iti biktima.

Gaputi buteng, nagtataray dagiti tattao ngem nakitada a nakasuot ti helmet ken agpada a naka jacket ti black dagiti suspek.

Nagsagaba ti maysa a tama manipud iti calibre 45 a paltog ti biktima kasaruno ti panangkumpirma dagiti otoridad nga adda daytoy iti nasayaat nga kasasaad.

-- ADVERTISEMENT --

Madama pay laeng iti panangammo dagiti otoridad iti motibo ti pammaltog.

Kabayatanna maipalagip, madama ti pannakadingngeg ti kaso ti biktima a frustrated murder a napasamak idiay Barangay Patpatta idi napan nga tawen.