LA UNION – Naka-red alert status ita ti Naval Forces Northern Luzon (NFNL) ken nakasagana metten iti binukel da a dua a bunggoy nga agresponde kadagiti agkasapolan ti tulong, iti posible a panagduprak ti bagyo Ulysses ditoy La Union.

Iti eksklusibo a pannakiuman ti Bombo Radyo La Union kenni Lt. Jaypee Abuan, spokesman ti Naval Forces Northern Luzon (NFNL), nakasagana da anyaman nga oras a kiddawen ti Office of the Civil Defense (OCD) iti tulong da, tapno agresponde iti kalamidad.

Segun kenni Abuan, nakatutok da ita iti coastal towns kalpasan a nangiruar ti PAGASA iti storm surge warning.

-- Advertising --

Kagiddan daytoy, nagpanawagan ni Abuan kadagiti residente nga asideg iti kabaybayan nga umakaren a nasapsapa tapno maliklikan ti  disgrasya wenno pannakaisagmak.

Manipud iti 10 nga ili ditoy La Union a nakapasidong iti Warning Signal#2, a pakaibilangan ti Burgos, Naguilian, Bauang, Caba, Aringay, Tubao, Pugo, Santo Tomas, Rosario, ken Agoo, innem ditoy iti maibilang a coastal towns.

Siniguro pay ni Abuan nga “in good condition” dagiti arwaten da, kas iti rubber boats ken m35 boat, para iti aramiden a panagresponde ingkaso a dumuprak iti  bagyo Ulysses ditoy probinsiya.