LA UNION – Pakabuklan a 120,520 nga indibidwal a karaman iti A-1, A-2, ken A-3 priority groups iti nalpasen a nabakunaan ti 1st dose iti Covid-19 vaccine iti intero a Region 1.

Umabot metten iti 38,085 individuals iti ‘fully vaccinated’ wenno naka-kumpleton iti dua a doses ti Covid-19 vaccine.

-- Advertising --

Segun kenni John Paul Aquino, senior health program officer iti DOH Region 1, dagiti nabakunaan ket pakairamanan dagiti healthcare workers, senior citizens ken dagiti addaan ti commorbidities.

Namnamaen dagiti health authorities ditoy rehiyon a pumaspas iti taray ti vaccination rollout nu tuloy-tuloy met iti panagsangpet dagiti suplay a bakuna.

Iti agdama, agtultuloy pay laeng iti panagbakuna kadagiti karaman iti A-1 ken A-2 priority lists.

Kabayatanna, inton sumrek iti third quarter ti tawen, manamnama a marugyan metten ti panagbakuna kadagiti kabilang iti A-4 priority group partikular dagiti mangmangged iti essential sectors.

Agtultuloy iti panangallukoy ti DOH Region 1 kadagiti karaman iti eligible population nga agpabakuna kontra Covid-19 tapno magun-od iti tarigagay a ‘herd immunity’ ken maparmek metten iti makapatay a virus.