LA UNION – Nakailista iti innem a baro a kaso ti COVID 19 iti probinsiya ti La Union idi kalman, Disyembre 13, 2020.

Dagiti innem a baro a kaso ket manipud ili a Bangar (2), Bacnotan (1), Luna (1),  San Gabriel (1), ken San Fernando City, La Union, maysa.

Da Patients No. 703, 704, 705, ken 706 ket agpapada nga asymptomatic ken naka-isolate idiay Bacnotan District Hospital.

-- Advertising --

Bayat a ni Patient No. 707, symptomatic, ket naka-isolate iti maysa a pribado nga ospital ditoy syudad.

Ni Patient No. 708, residente  ti Barangay Canaoay, San Fernando City, 27-anyos, babae, asymptomatic, awanan ti exposure iti Covid patient ngem addaan ti travel history ket naipasidong iti maysa nga isolation facility ditoy syudad.

Ngem nu innem iti baro a nagpositibo iti sakit, ad-adu met dagiti nailista a recoveries idi kalman, nga umabot ti pito.

Pakaibilangan ditoy dagiti lima manipud syudad ti San Fernando, maysa idiay ili ti Bangar ken Luna.

Gaputi dayta, iti probinsiya ti La Union ket addaan pay ti 64 active cases ken agtultuloy nga agpapaimbag.

Addan iti pakabuklan a 708 dagiti kumpirmado a kaso ti Covid 19 iti intero a probinsiya, 623 metten dagiti recoveries, ken agtaltalinaed a 21 iti total deaths.

Kabayatanna, segun iti  City COVID-19 Inter-Agency Task Force iti panangidaulo ti CHO ken koordinasyon ti DOH-RO1 babaen ti Regional Epidemiology and Surveillance Unit (RESU) ken Barangay Council, maipatpatungpal metten iti contact tracing ken strict measures iti maibilang a critical zone.