LA UNION – Manamnama a mangrugi a maibunong inton Lunes, Abril 12, iti electronic home quarantine pass (EHQP) para kadagiti residente ditoy syudad, tapno makastrek da kadagiti establisimento partikular iti grocery stores, botika, merkado publiko, ken dadduma pay a pasdek a mangipapaay iti essential goods and services.

Iti eksklusibo a pannakiuman ti Bombo Radyo La Union kenni Julie Ann Hipona, chief iti City Disaster Risk Reduction and Management Office (CDRRMO), kinuna na a dagiti maipaayan ti EHQP ket base iti listaan nga isumite kadakuada dagiti 59 a barangay ditoy syudad ti San Fernando.

-- Advertising --

Kinuna na a madama ita ti printing and releasing da iti EHQP ket maka-ammo metten dagiti barangay officials a mangibunong kadagiti kalugaran da inton Lunes.

Maysa laeng a miyembro iti kada pamilya ti maikkan ti EHQP ken saan a mabalin nga usaren wenno ipabulod iti sabali a kameng ti pamilya.

Inlawlawag na a dagiti awanan ti EHQP ngem nasisita iti gagara da a rumuar, mabalin da ti mangala iti Special Home Quarantine Pass iti barangay.

Adda met laeng kunana iti naituding nga aldaw a panangusar kadagiti nasao a quarantine pass.

Mausar laeng ti EHQP agingga inton Abril 23, iti maudi nga aldaw MECQ.

CDRRMO Chief Julie Ann Hipona