Immawat iti sagtunggal P5,000 pesos ken food subsidy dagiti 165 a mannalon ken mangngalap ditoy La Union nga impaay iti Department of Agreictulture itay nabiit.

Indauluan ni DA Secretary William Dar iti pannakaibunong dagiti tulong kadagiti mangngalap ken mannalon nga paset iti programa a naawagan iti Cash and Food Subsidy for Marginal Farmers and Fisherfolks Program iti Region 1.

Ti nadakamat a programa ket tarigagay nga maipaayan dagiti mannalon ken mangngalap iti cash assistance a P3,000 pesos ken P2,000 pesos a balor iti itlog, manok ken bagas a maala babaen iti e-voucher dagitoy. Masapol a dagiti benepisaryo ket nakarehistro iti Farmers and Fisherfolk Registry System.

-- Advertising --

Malaksid kadagiti mannalon ken mangngalap, dagiti dadduma pay a benepisaryo ket dagiti coconut farmers ken Indigenous People.

Iti naipaulog nga implementing guidelines iti programa, dagiti benepisaryo ket nasken nga addaan iti talon a saan a lumbes iti nasurok maysa nga ektarya. Naggapu dagitoy iti 4th, 5th ken 6th income classification manipud kadagiti syudad nga adda iti sidong iti 5th ken 6th income classification.

Kasapolan a saan nga karaman dagitoy iti social amelioration programs wenno dadduma a programa dagiti ahensiya iti gobyerno.

Ti CFSMFF program ket saan laeng a pagsayaatan para kadagiti immawat iti kuarta ken ken food assistance ngem ketdi matulungan na pay dagiti kooperatiba ken asosasyon nga accredited ken kabinnulig iti DA kas supplier kadagiti manok, itlog, ken rice component iti nadakamat a programa.

Ti CFSP ket proyekto iti DA iti pannakitinnulong iti Bureau of Fisheries and Aquatic Resources, Philippine Coconut Authority, National Commission on Indigenous People ken Sugar Regulatory Authority nga addaan iti pakabuklan a budget iti P4.5B manipud iti P6.5B stimulus package para iti sektor iti agrikultura para iti social amelioration project iti sidong iti Bayanihan to Heal as One Act iti Duterte Administration.