LA UNION – Agpanpanawagan iti tuloy dagiti Filipino construction workers nga agtrabtrabaho idiay Dannam, Kingdom of Saudi Arabia (KSA) gapu ti saan a nasayaat a kasasaad a pagnanaedan dagitoy.

Iti pannakiuman ti Bombo Radyo, agpada nga impeksa da Ramil Mesurado a tubo ti Quezon ken
Rolando dela Cruz a taga Nueva Ecija dagiti parikot a mapaspasaranda ti pagtratrabahuan dagitoy a lugar.

-- Advertising --

Kinunada nga iti roof top ti pagdagdagusanda a pasdek iti pagturturoganda gapu iti nalabes kinabara ti silid a nangipadagusan ti employer kadakuada.

Inladawanda a kasla addada iti uneg ti incubator ti nasao a silid nga awanan ti aircon.

Malaksid kadakuada a Filipino, adda pay ti sabali a ganganaed ti kadduada a matmaturog iti roof top.

Agan-anusda iti sand storm ti agpatnag kabayatan nga agpalpalabasda iti rabii iti tuktok ti pasdek.

Kinuna pay da Ramil ken Rolando a parikotda pay iti danum a mainum ken pagdigos.

Impakaammoda metten kadagiti maseknan ti parikot dagitoy ngem saanda a naikaskaso.

Mangnamnama dagiti nasao a construction workers a masungbatan ti arungaing dagitoy.