LA UNION – Pimmusay iti maysa a 38-anyos a mister kalpasan nga aksidente a naikaglis iti kalkalyen da nga abot para iti ar-aramiden da a bubon idiay Brgy. Ribsuan, Naguilian, La Union idi rabii ti Lunes, May 25.

Nabigbig iti biktima a ni Darwin Ag-agwa, computer specialist ken residente ti Sagada, Mountain Province.

-- Advertising --

Base iti impormasyon manipud Naguilian Police Station, immuna a nakaawat da ti tawag manipud iti maysa a barangay tanod ket agpatpatulong iti pulisya tapno maisayangkat ti rescue operation iti lugar.

Idi simmangpet dagiti otoridad iti lugar, nairwaren dagiti residente iti awan puot a biktima manipud iti 30 ft a kauneg nga abot iti makal-kali a bubon.

Base iti report ti pulisya, bumaba koma ti biktima iti abut tapno iddepen iti water pump, ngem naikaglis kasaruno ti pannakaitupa ti ulo na iti bato ken nagsagaba iti nakaru a head injury.

Naiturong pay ti biktima idiay Naguilian District Hospital ngem naideklara a dead on arrival.