LA UNION – Agpada a pinaglibakan da Barangay Captain Nicanor Ramos ti San Agustin, San Fernando City, La Union ken CDRRMO head Julie Ann Hipona, iti akusasyon ti maysa a gangannaet kontra iti kapitan ken uppat a kakadwa na a maipagarop a saan a nasayaat ti impakita da a kababalin ken maatap a panagkikil dagitoy ti P20-k tunggal turista.

Iti eksklusibo a pannakiuman ti Bombo Radyo La Union kenni Hipona, inlawlawag na a pudno nga adda dua (2) a personnel ti CDRRMO a nagturong iti Barangay San Agustin tapno i-beripika iti report seknan iti presensiya dagiti turista manipud Pampanga.

-- Advertising --

Naamwan da Hipona a pudno nga adda iti 15 agingga 17 a turista pakairamanan iti gangannaet a managan Rob Gartside manipud probinsiya ti Pampanga, a naaktuan dagiti dua nga BHW, Barangay Kapitan Ramos ken dua a konsehal na, nga agi-inom, agdidigos iti baybay, agje-jetski, banag a mailabsing iti maipatpatungpal pay laeng nga allagaden iti pananglaban ti sakit a COVID-19 nangruna ket awan ti maipakita dagiti turista nga RT-PCR test result, a maysa kadagiti requirement para kadagiti turista a sumrek ditoy La Union.

Impaganetget ni Hipona a nu pagibasaran dagiti allagaden iti tourism bubble, dagiti mapalubosan pay laeng a sumrek ditoy La Union ket dagiti turista nga aggapo iti Region One ken Baguio City.

Kabayatanna, impalawag met ni Kapitan Ramos nga idi Marso 12, nagturong kenkuana iti gangannaet a ni Gartside tapno i-pakada iti panagusar da ti Giant Slide a pagay-ayam dagiti ubbing.

Pinatgan met ni Ramos iti nasao a kiddaw ti gangannaet, ngem iti kondisyon a kasapolan nga adda iti presensiya dagiti barangay officials, a mangipatungpal iti health protocols iti tengnga ti sangsangwen a pandemya, kangrunaan na iti social distancing.

Ngem maipagarop a saanen a napaka-amwan ni Kapitan Ramos iti aktibidad da Gartside, isunga nangisayangkat dagitoy ti inspeksiyon ket nadiskubre da a nalabsing iti health protocols.

Innayon pay ni Ramos nga awan kinapudno na iti ibagbaga ni Gartside a milyonen iti naipaay na a tulong iti nasao a barangay.

Kinuna na a sipud nagtugaw kas Kapitan idi 2018, awan pay met iti naawat ti konseho barangay a financial aid wenno inganwat a charity works iti gangannaet ken awan met iti pakakitaan.

Gaputi insidente, napagnumwan ti lokal a gobyerno a mangaramid ti incident report a pakailanadan iti palawag iti amin nga involved iti insidente, a maak-akusaran a nagkikil ti P20,000 tunggal maysa kadagiti turista a simmangbay ditoy probinsiya.