Umabot itan ti nasurok 3,400 nga apektado a hograisers gapu iti ASF ti nabayadanen ti DA Region 1 ditoy Ilocos Region.

Daytoy ket babaen pay laeng iti agtultuloy a panangipaay ti nakadamat a regional office ti indemnification fund para kadagiti apektado a hograisers ditoy rehiyon.

-- Advertising --

Base iti datos ti DA Region 1, manipud iti 6, 628 a pakabuklan a bilang dagiti apektado a hograisers ditoy rehiyon, dumanon ita ti 3,481 a hograisers ti nabayadanen.

Agbalor ti P190,755,000 pesos ti pakabuklan a balor itan ti naipaay ti DA Region 1 kadagiti nadakamat a bilang dagiti nabayadanen a hograisers a buklen ti 23,951 heads iti baboy a naipasidong idi ti culling operation.

Iti pannakiuman ti Bombo Radyo La Union kenni DA Region 1 Communication Officer Vida Cacal, kinunana nga addan ti pondo a nakasagana a maipaay iti 940 a hograisers ditoy Rehiyon.

Maururay laeng kinunana iti agdama ti pannakavalidate dagiti recipients babaen iti Bureau of Animal Industry sakbay daytoy a maipaay.

Innayon na pay nga adda ti inrequest da pay a kanayonan a pondo para kadagiti nabatbati pay nga apektado a hograiser ditoy Rehiyon.

Agbalor ti P5,000 pesos per head iti baboy ti bayadan ti DA Region 1.

Maipalagip a dumanon itan ti 55 nga ili ditoy Ilocos region ti naapektaran ti ASF.

Base iti datos manipud iti DA Region 1, adda ti 34 ti apektado nga ili ti asf idiay Pangasinan, agtaltalinaed a 14 ditoy La Union, 5 idiay Ilocos Sur, ken 2 dagiti apektado nga areas idiay Ilocos Norte a dagitoy ket tatta laeng a tawen a nailista.

Numan pay kasta ket kaadwan dagitoy nga ili ket nabayag dan a saan a nakailislista ti kaso nangruna ditoy La Union a saanen a nakailislista ti kaso ti ASF sipud pay idi napalabas a tawen.

Segun pay kenni Cacal ket improving met tattan ti sitwasyon maipanggep iti asf ken kasta pay a tuloy tuloy itattan ti maisaysayangkat a programa ti DA maipanggep iti recovery program kadagiti naapektaran.