LA UNION – Agtultuloy iti panagsukimat ti pulisya iti napasamak a panagsikig ti dump truck a nakatayan iti dua a pahinente daytoy idiay kabanbantayan a paset ti Barangay Dagup, ili ti Bagulin, La Union.

Base ti inisyal nga imbestigasyon ti Bagulin Police, maipagarup a napukawan ti kontrol iti panagmaneho ti truck driver a ni Harold Castro idi a makagteng ti nasao a lugan idiay pasikko a paset ti kalsada.

Maipagarup a nagsikig iti igid ti kalsada ti truck ken naipullasit iti sumagmamano a nakalugan ditoy.

-- Advertising --

Dead on arrival idiay ospital dagiti dua a pahinente a nabigbig a ni Gamie Rimando, 28, residente iti Barangay Liaoc Sur, Naguilian, La Union ken ti maysa pay a saan a nabigbig a lalaki.

Adda pay laeng idiay ospital ti driver ken ti maysa pay a pahinente daytoy a naglak-am kadagiti sugat ti bagida.