-- ADVERTISEMENT --

Maysa ti natay ken 1 iti kritikal kalpasan ti panagdinnungpar ti minaneho da a motorsiklo iti national highway a masakupan ti Brgy. Payocpoc Sur, Bauang, La Union agarup alas-5:35 idi malem kalman, Nov. 20.

Nabigbig ti pimmusay ken nagmaneho iti maysa a motorsiklo a ni Jovannie Genove, 32-anyos, addaan asawa, security guard ken residente iti Caba, La Union bayat a kritikal met iti kondisyon ita ti nakadinnungpar na a motorcycle rider a ni Dexter Mendoza, 29-anyos, delivery rider ken residente ti Brgy. Upper Bimmotobot, Naguilian, La Union.

Base iti CCTV footage, agturturong iti abagatan a direksyon ti motorsiklo a minaneho ni Genove idi nag-overtake daytoy iti sarsarunwenna a tricycle ngem maipagarup a nasagid na ti saka ti backride ti tricycle a nangitunda ti pannakapukaw daytoy iti kontrol iti manmanihwenna a motorsiklo kasaruno iti panagdinnungpar da iti motorsiklo a minaneho ni Mendoza nga agturturong ti amianan a direksyon.

Nagsagaba iti pannakadundunor dagiti dua a motorcycle riders kasaruno ti pannakaiturong dagitoy iti pagagasan ngem daksang gasat ket pimmusay ni Genove.

Naamwan a napaspas ti panagpataray ni Genove bayat a paawiden daytoy idi napasamak ti insidente.

-- ADVERTISEMENT --

Pada met a nakaaramat ti helmet dagiti dua a biktima.