LAOAG CITY – Kalikagom ni Vice Mayor Vicentito Lazo ditoy ciudad ti Laoag a maimbestigar dagiti reports a maaw-awat ti opisina na mainaig iti isyu ti vaccination rollout.

Inbatad na a basar iti maaw-awat na a reports ket adda ti “palakasan system” no sadinno ket maipagarop nga adda ti sumingsingit iti pila dagiti agbakuna.

Gapo iti daytoy, binilin na ti Committee on Health a maimbestigar daytoy a banag.

Mainaig iti daytoy, kuna ni Dr. Joseph Adaya a saan da a responsibilidad nga agilista kadagiti agbakuna ditoy ciudad ti Laoag.

Inbatad na a gapo ta nabukel ti Task Force Bakuna ditoy ciudad ket adda dagiti sumagmamano a departamento nga akin-trabaho iti panagbakuna.

Naamoan a ti City Planning and Development Office pakairamanan ti CSWDO ti agala ti nagan kadagiti barangay kangrunaan na kadagiti maiprayoridad a mabakunaan kontra covid-19.

Kalpasan daytoy, dagiti dua a departamento pakairamaman ti Community Affairs and Development Office ket tawagan da dagiti adda iti listaan tapno kumpirmaran no kayat da ti agbakuna.

Kabayatanna, naglikudan ni Adaya ti rakurak ni Lazo a pabasulen ti doctor dagiti nurses mainaig iti maipagarop a panagsingit iti panagbakuna.