ADVERTISEMENT

LAOAG CITY – Nabukel ti Special Investigation Task Group (SITG) nga isu ti kangrunaan a mangtutuk iti imbestigasyon mainaig iti pannakapalto-paltog a poon ti nakatayan ni Konsehal Apolonio Medrano iti ili ti Sarrat.

Daytoy ti inbatad ni Police Major Jephre Taccad, ti pannakangiwat ti Ilocos Norte Police Provincial Office (INPPO) iti naiyuswat a press conference.

Karaman kadagiti nagatendar iti press conference ket ti mangidadaulo ti Scene of the Crime Operatives (SOCO) a ni Police Lt. Nilo Domingo ken ni Police Major Carlo Abing, ti chief of police iti ili ti Sarrat.

Rinugyan a dagus ti nagimbestigar dagiti imbestigador ti INPPO, karaman ti Regional Intelligence Unit ken PNP-CIDG.

Inbatad ni Abing a saan da pay a maibaga no gun for hire dagiti nangpapatay ken ni Medrano gapu ta awan pay ti naibaga ti pamilya ti konsehal no adda dagiti maaw-awat na a pangta iti biag ken dadduma pay.

-- ADVERTISEMENT --

Immuna iti daytoy, nakatakder ni Medrano iti ruwar ti lugan na partikular iti driver’s side idi pinalto-paltogan dagiti saan pay a nabigbig a suspek.

Rumrumuar nga inuray dagiti suspek ti biktima ken adda da iti likodan ti nagparkingan ti lugan ti konsehal.

Naala iti nakapasamakan ti pammaltog ti maysa a deformed slug, rungrung ti sigarilyo, idinto a naala met a mismo iti uneg ti lugan ti konsehal ti maysa nga INGRAM machine gun nga addaan ti Suppressor ken tallo nga empty magazine; maysa a short ken dua a long magazine; maysa a magazine nga addaan ti 15 a bala ti caliber 9mm; maysa a long magazine para iti 5.56mm nga addaan ti 26 a rounds; dua a kahon nga addaan ti 46 a rounds para iti 5.56mm; nokia keypad cellphone, ken dadduma pay a napapateg a kagamitan ni Medrano.