ADVERTISEMENT

LAOAG CITY – Inpakaammo ni PLt. Col. Mar Louise Bondoc, ti hepe ti PNP ditoy siudad ti Laoag nga inadmitir ti babai a nangireport ti maladaga a naibati iti sango ti maysa a pagtaengan iti Brgy. 1 ditoy siudad nga isu a mismo a nangipasngay iti maladaga.

Kuna ni Bondoc nga iti pannakaiyuswat ti interogasyon iti babai, inlawlawagna a nagamak iti posible a reaksyon ti kabbalay na a kameng ti LGBT iti panagsikog na rason nga inlem-lemmeng na agingga nga inbati na ti maladaga idi naipasngay na daytoy.

Mainaig iti daytoy, kuna ni Bondoc a maikatlon nga anak ti babai ti maladaga.

Immunan nga inpakaammo ti hepe nga iti pannakaipadalan iti medical examination ti babai ket adda ti pagilasinan a nagpasngay.

Inbatad ni Bondoc nga iti agdama ket nagtalinaed iti sidong ti CSWDO ti maladaga bayat a maiyus-uswat ti assessment iti ina na.

-- ADVERTISEMENT --

Kabayatanna, kuna ni Bondoc nga awan pay ti pinal a desisyon nu mapilaan ti kaso ti ina.

Maipalagip nga iti kallabes ket nagkamang ti babai iti stasyon ti pulisya ditoy siudad ken isuna ti mismo a nagreport iti ubing a naibati iti sango ti maysa a balay.

Adda ti nagbalin a panagdudua dagiti otoridad a ti babai ti akin-anak iti maladaga isut gapuna nga inpa-medical da daytoy.

Naamoan basar iti immunan a panagimbestigar dagiti otoridad a ti babai ket naggapo iti Metro Manila ken immay ditoy ciudad ti Laoag gapu iti karelasyon na a kameng ti LGBT.