ADVERTISEMENT

LAOAG CITY – Adda ti tallo a drug group a monmonitoren ti Provincial Drug Enforcement Unit (PDEU) nga agop-operar ditoy probinsya.

Daytoy ti inbatad ni Police Major Jephre Taccad, ti pannakangiwat ti llocos Norte Police Provincial Office (INPPO).

Segun ken ni Taccad, iti inisyal a monitoring ti PDEU ket umabot ti uppat agingga iti lima ti miembro ti kada drug group.

Kuna na nga agtultuloy ti intelligence monitoring ti PDEU ken apaman a makompleto da daytoy ket mangisayangkat danton ti operasyon.

Nupay kasta, saan pay a maibaga ni Taccad no dagiti nasao a grupo ket maibilang a bigtime gapu ta dagiti impormasyon pay laeng ti naaw-awat da manipod kadagiti immunan a natiliw iti drug operation.

-- ADVERTISEMENT --

Immapela met ni Taccad iti publiko iti naa-anay a pannaki-kooperar ken makitinnulong iti PNP tapno matiliw dagiti addaan ti illegal nga aktibidad ditoy probinsya.

Kabayatanna, inpasingked ni Taccad a manageable pay laeng ti PNP ti drug situation iti kada ili ditoy probinsya.

Inpanakkel na a dagus da a mamonmonitor ken mabigbig ti kinatao dagiti addaan ti illegal nga aktibidad iti nagduduma nga ili ken ciudad ditoy probinsya no sadinno a dagus a maisaysayangkatan ti operasyon dagitoy.