ADVERTISEMENT

LAOAG CITY – Nagtalinaed nga adda iti alert level 1 ti covid-19 iti South Africa iti baet ti kumpirmasyon ti baro a variant ti covid-19 nga Omicron.

Daytoy ti inpakaammo ni Bombo International News Correspondent Miriam Espiritu Lutchmadoo idiay South Africa iti eksklusibo nga interview ti Bombo Radyo Laoag.

Segun ken ni Lutchmadoo, awan pay dagiti baro a restriksyon a naipatungpal iti South Africa kageddan ti panagruar ti omicron variant.

Kuna nga awan pay ti nabaliwan kadagiti masursurot a protocols iti South Africa ngem manamnama nga adda ti ipatungpal ti gobierno iti sumarsaruno nga aldaw tapno maliklikan ti panagwaras ti virus.

Kabayatanna, inbatad ni Luchmadoo a nagtalinaed a naiget ti panaggannad da manipod iti virus nangruna kadagiti kadaraan a Pilipino nga agnanaed iti South Africa.

-- ADVERTISEMENT --

Immunan nga inpakaammo ni Luchmadoo a manipod iti dati a 100 a kaso ti covid-19 ket umabot iti 1,400 a kaso ti nairekord iti dua a lawas.

Innayun na nga adda ti nababa a vaccination rate iti South Africa gapu iti panagkedked dagiti tattao nga agpabakuna nu sadino a kangrunaan a rason ket ti panagamak nga amangan a makapatay ti covid-19 vaccine.