LAOAG CITY – Inbatad ni Miss Ellen Joy Cabuyadao, apoko ti pimmusay a baket iti Barangay Barbarangay iti ili ti Banna a nasakit ti nakem da iti kayat a mapasamak ti Municipal Health Office (MHO) iti nasao nga ili.

Daytoy ket ti papan koma panangala ti MHO tapno itabon dan ti bangkay ti lola da nga agtawen ti 86 gapu ta inbaga da a daytoy ket suspected case ti covid-19 idinto a saan met a naswab test wenno naipadalan ti antigen test ti maseknan.

Inlawlawag ni Cabuyadao a pimmusay ti lola na idi parbangon ti domingo, setyembre 12 ngem patien da a natural death ti ipupusay na gapu ta baketen.

Kuna na pay nga adda ti sertipikasyon ti kapitan da iti barangay a ti lola na ket saan a PUI wenno PUM iti nadakamat a lugar no sadinno a saan pulos a nagsaksakit ngem mabalin a natay gapu iti kinabaket nan.

Nupay kasta, inbaga ni Cabuyadao nga iti maikalima nga aldaw a nakamansayag ti lola da ket napan dagiti taga-RHU iti panangidaulo ni Doctor Remegios Peralta ket inbilin da nga itabon dan daytoy gapu ta suspected case ti covid-19 ngem saan da met a mailawlawag no kasanu a napasamak.

-- Advertisement --

Gapu iti daytoy, inbatad ni Cabuyadao a saanda nga inpalubos a basta lattan itabon da ti bangkay ti lola da ken nakisarita da a mapan da makisarita ken ni Mayor Albert Chua iti ciudad ti Batac ta iti Barangay Biningan a paset ti ciudad ti pangitabonan da.

Immanugot ti mayor ngem masapol nga adda ti death certificate ti baket manipod iti RHU  nga isu ti mapanda alaen ita nga aldaw.

Iti baet daytoy, kuna ni Cabuyadao a saanda pay a masigurado no ania ti ikabil ti RHU iti Death Certificate ti lola da.

Namin-ado a daras a tinawag ti news team ti Bombo Radyo ni Doctora Peralta ngem saan a nagsungsungbat.

Pinadas pay ti Bombo Radyo a tawagan ti numero iti mismo nga RHU ngem basar iti nakasungbat ket ado ti pasyente ti doctora, ken iti panagtawag manen ti news team ket naka-blockā€™en ti cellphone number ti Bombo Radyo.

Kabayatanna, inbaga ni Doctor Norman Rabago, ti Covid-19 consultant ditoy probinsya a masapol a dagus a ma-antigen test wenno maswab test kalpasan a pumusay ken saan pay a nabalsamar.