LAOAG CITY – Nasisita ti panangtratar ti kongreso iti nagduduma a programa ken aktibidad ti gobierno.

Daytoy ti inbatad ni Professor Herdy Yumul iti Mariano Marcos State University (MMSU) ken maysa a sociologist ditoy probinsya seknan ti agtultuloy nga imbestigasyon iti maipagarup nga anomalya a pannakagatang kadagiti medical supplies a paset ti covid-19 response.

Segun ken ni Yumul, dakkel nga isyu daytoy para iti intero a pagilian nangruna iti agdama a sitwasyon nga adda ti pandemiya.

Nu pay kasta, kuna ni Yumul a gapu iti panagsinsinnukat ti nabara a sarita ni Presidente Rodrigo Duterte kenni Senator Richard Gordon ket maap-apektaran ti pannakatratar ti nasao nga isyu.

Inbatad na nga arigna sensitibo ni Duterte iti daytoy rason nga adda pay ti panangbweltana kenni Gordon a nasken a maimbestigaran met ti idadauloan daytoy wenno ti Philippine Red Cross.

-- Advertisement --

Immuna iti daytoy, kuna ni Yumul a ti mapaspasamak iti nagbaetan ti presidente kenni Gordon ket dakkel a makaapektar iti panagkita ti publiko kadagiti mangidadaulo ditoy pagilian.

Kuna na a makaperdi pay daytoy iti imahe ti pagilian iti intero a lubong.

Kabayatanna, inbatad ni Yumul a nu mapaneknekan nga awan ti linabsing wenno saan a maduktalan a guilty ti pharmally a maitudtudo a puon ti maanomalya a pannakagatang ti medical supplies ket arigna nagsayang laeng ti panawen ken dagiti agpanpanday linteg a nangtratar iti nasao nga isyu.