ADVERTISEMENT

LAOAG CITY – Inpasigurado ni Police Lieutenant Colonel Mar Louise Bondoc, ti Chief of Police ti Philippine National Police ditoy Siudad ti Laoag a saan a maapektaran ti operasionda kabayatan ti holiday break dagiti pulis.

Segun kenkuana, addan ti naawatda a mandar manipod iti Ilocos Norte Police Provincial Official pakaseknan iti daytoy a banag tapno mapagbalin met laeng a nalinak, naurnos ken natalna iti panangselebrar ti paskua ken panangsarabo ti baro a tawen.

Inbatadna a maipatungpal ti 50% scheme ti operasionda iti kaaldawan ti paskua ken baro a tawen kalpasan nga adda dagiti sumagmamano a kameng ti pulisia ti nagisubmitir para iti holiday break dagitoy.

Kunana a dagiti manggundaway iti Christmas Break ket inton Disiembre 18 agingga 26 idinto nga iti New Year’s Break ket inton Disiembre 28 agingga Enero 5.

Inlawlawagna a saan met a mabalin a gundawayan dagiti pulis iti agpada a Christmas Break ken New Year’s Break tapno saan a mapilay ti operasionda ken umdas dagiti mai-deploy a pulis kadagiti kangrunaan a lugar ken establishmento a pagturungan dagiti tattao inton holiday season.

-- ADVERTISEMENT --

Inpakaammona a mabalin a temporario pay laeng nga ag-report dagiti pulis kadagiti kuerpo ti pulisia kadagiti bukodda a lugar tapno makapagserbida latta kadagiti umili nga adda iti asideg kadagiti ipatpategda iti biag.

Kabayatanna, innayonna nga adda ti 100 a Police Personnel ti PNP Laoag ken 30 dagiti agdama a naka-schooling.