LAOAG CITY РNaarestar ti maysa a lalaki iti Brgy. Maglaoi Norte iti ili ti Currimao gapo iti panagprobokar na.

Segun ken ni Police Corporal Johnrex Opal Dela Cruz, ti Investigator On Case ti Philippine National Police iti nasao nga ili, ti suspek ket ni Marlon Fader y Barola, agtawen ti 38, awanan asawa, mangngalap ken residente ti Brgy. Maglaoi Norte iti ili ti Currimao.

Inbatad na a nakaawat da ti tawag manipod ken ni Brgy. Captain Leomel Sumngat ti nadakamat a Barangay no sadino nga inpakaammo ti Kapitan kadakuada nga adda ti lalaki nga agprobprobokar iti pagtaengan da.

Gapu iti daytoy, kunana a dagus a nagresponde ti Kapitan ken kadua na ni Brgy. Tanod Erwin Estavillo ket dita a nakita dagiti Barangay Officials a nakaiggem ti caliber .22 a homemade short firearm nga addaan ti uppat a bala ti maseknan.

Nupay kasta, inlawlawag na nga idi simmangpet dan iti lugar ket in-turn over dagiti opisial ti Barangay kadakuada a napan nagresponde a pulis ti nasao a short firearm.

Inlawlawag na a dagus da met nga inarestar ti suspek ken dimmalan iti Municipal Health Office ti Currimao para iti medico legal kalpasan ket naikabil daytoy iti kuerpo ti pulisia ti Currimao.

Mainaig iti daytoy, inpalgak na a namunganay ti panagprobokar ti suspek gapu ta nagrir ida ti kabsat na a babai iti saan pay a masinunuo a rason.

Kunana nga awan met ti napasamak a panagdangran ken panagpaputok ti paltog ken adda iti impluwensiya ti nasanger ti suspek.

Innayonna a napilaan metten ti suspek gapu iti panagsalungasingna iti Republic Act No. 10591 wenno ti Comprehensive Law on Illegal Possession of Firearms and Ammunition.