ADVERTISEMENT

LAOAG CITY – Maragsakan ni Konsehal Rbee Ablan,  chairman ti Lakas-CMD ditoy probinsya kalpasan a pormalen nga inadaptar ti partido na ni dati Senador Ferdinand Marcos Jr. kas kandidato da iti kina-presidente ken running-mate ni Mayor Sara Duterte a tumaray met a para bise presidente.

Daytoy ket kalpasan a nangiparuk-at ti resolusyon ti nasao a partido maipanggep iti daytoy a banag.

Segun kenni Ablan, ad-adda pay a napapigsa ti tandem da dati a senador Marcos ken mayor Sara gapu ta malaksid iti Lakas-CMD ket kadwa da pay ti Hugpong ng Pagbabago a dati a partido ni mayor Sara idiay Davao ken ti Pwersa ng Masang Pilipino wenno PMP a partido ni dati presidente ken dati a Manila mayor Joseph Erap Ejercito Estrada.

Gapu iti daytoy, kuna ni Ablan a sigurado nga ado latta ti maala a botos ni Marcos idiay Mindanao ken iti National Capital Region (NCR).

Innayon ni Ablan nga iti ibibisita ti grupo ni BBM ke mayor Sara iti maysa a pasken ni Gov. Gwendolyn  Garcia iti probinsya ti Cebu ket mangipakita pay a maysa daytoy a senyales ti panagkakadwa dagiti maseknan.

-- ADVERTISEMENT --

Patien ni Ablan a babaen ti panagkakadwa ken panagtitinnulong dagiti nasao a partido a mabuyugan ti kararag ket dakkel ti namnama ti nasao a tandem a mangabak iti May 2022 national and local elections.