LAOAG CITY – Saan a ninamnama da Sang Panlungsod Member Jason Perara ken Sang Panlungsod member RJ Fariñas ti panangdillaw kadakuada ni Vice mayor Vicentito Lazo kabayatan ti sesyon da ditoy ciudad ti Laoag.

Segun ken ni Fariñas, pagsarsaritaan da laeng ken ni Perera ti maysa nga ordinansa a saan a naited kadakuada, dua nga aldaw sakbay ti regular session.

Inlawlawag ni Fariñas a basar iti pagalagadan ket masapol a maited kadakuada ti agenda, dua nga aldaw sakbay ti sesyon iti konseho ditoy ciudad ti Laoag.

Naamoan a dinamag ti bise mayor no mano nga oras ti kasapulan dagiti dua a konsehal tapno makapagsarita da ket isungbat ni Fariñas a maysa nga oras ngem nangted laeng ti lima a minutos ni Lazo.

Inpairekord pay ti bise mayor ti papan panagtakder ni Fariñas  iti ridaw.

Inkalintegan ni Fariñas nga ad-adda a makaistorbo no kanayun ti panagpakada da iti papanda iti Comfort Room (CR) kabayatan ti regular session.

Kabayatanna, inbaga met ni Perera a masdaaw no apay nga isuda laeng ken ni Fariñas ti nakita ni Lazo idinto a makaringgor pay dagiti dadduma a kakadwa da iti konseho.