LAOAG CITY – Madengeg intono bigat iti Sang. Panlungsod ti kaso ni Barangay Chairman Rodolfo Ramirez iti Barangay Salet-Bulangon ditoy ciudad ti Laoag.

Daytoy ti kinumpirmaran ni Vice Mayor Vicentito Lazo ditoy ciudad kabayatan ti sesyon.

Namunganay ti kaso administratibo ni Ramirez iti saan na a pangisyu ti fencing permit a kidkidawen ti complainant ken ummunan nga inlawlawag ni Ramirez nga adda ti riri iti nakadamat a sanikua.

Kabayatanna, manamnama met a maipatulod ti subpoena duces tecum iti Comission on Audit para iti maikadwa a kaso administratibo ni Barangay Kagawad Rufino Bareng iti Barangay 27 ditoy ciudad.

Naamoan a ti subpoena duces tecum ket isu ti usaren ti Sang. Panlungsod tapno makaala da ti dokumento manipud iti COA kalpasan nga ummunan a nagkedked ti ahensya iti kiddaw ti konseho para iti kasapulan a dokumento para iti kaso.

Daytoy ket gapo ta adda pay laeng ti nakapenpen a kaso iti higher office ti COA seknan iti maipagarop nga iregularidad iti pannaka-realign ti pondo a manipud iti barangay hall ket naiyakar iti arko iti nadakamat a barangay.

Maipalagip a namunganay ti kaso ni Bareng gapo iti maipagarop nga iligal a pannakaaramid ti arko ti Barangay 27 ditoy ciudad ken rumrumuar a Marso 4, 2018 a naipasa ti resolusyon ngem awan ti nailanad iti minutes of the meeting.