LAOAG CITY РPimmusayen ni IN-C2237, babai, agtawen ti 55, taga Barangay Pipias iti ili ti Bacarra  kabayatan a maag-agasan iti Mariano Marcos Memorial Hospital and Medical Center iti ciudad ti Batac.

Naamoan a ni IN-C2237 ket naala na ti virus manipod ken ni IN-C2150 ken daytoy ket symptomatic.

Inbaga ni Barangay Kagawad Chito Visaya iti Barangay Pipias iti ili ti Bacarra a nakigtot da iti nagsaruno nga ipupusay ti dua a kabarangayan da a nagpositibo ti covid-19.

Gapu iti daytoy, immapela ni Visaya kadagiti kabarangayan na nga agtitinnulong da koma tapno awanen ti makaptan ti makapatay a virus iti lugar da babaen ti panangsurot da ti minimum health protocols kas ti panagsuot ti facemask, face shield ken suruten ti social distancing.

Innayon na nga agpannuray koma kadakuada ti disiplina gapu ta saan da a kabaelan nga opisyal ti barangay ti manglaban ti mapaspasaran a pandemya no saan a tumulong dagiti kabarangayan da.

Kuna pay ti barangay kagawad a saan da koma a liplipatan ti agkararag gapu ta ti Diyos laeng ti ammo da a kangrunaan a makatulong tapno mapukaw ti covid-19 virus.

Mainaig iti daytoy, inbaga ni Visaya a dimmalanen ti swab test dagiti kabbalay ni IN-C2237 ket nagpositibo ti tallo a dagitoy ket dua nga ubbing ken maysa a baket.

Segun pay iti barangay kagawad, awan ti ammo da a sakit ni IN-C2237 isut gapu na a saanda a ninamnama a pumusay daytoy kalpasan a nakaptan ti covid-19 virus.