ADVERTISEMENT

LAOAG CITY – Naiget ti panangmonitor ken panang-evaluate ti Local Finance Committee ti pannakaipababa ti bayad ti Rapid Antigen Test.

Daytoy ket kas paset iti panangbigbig ti probinsia a masapol a maprotehiran dagiti kakailian manipod iti umiso a pagbayad ti Rapid Antigen Test a napateg a serbisio iti daytoy a panawen ti “public health emergency.”

Naamoan a daytoy ket pammilin ni Gob. Matthew Marcos Manotoc tapno maalay-ayan ti paggastusan dagiti kakailian nga agawid ditoy Ilocos Norte ken dagiti turista nga umay ditoy probinsia.

Inbatad na nga agtultuloy dagiti addang nga ar-aramiden ti gobierno probinsial tapno maipasigurado a saan a marigatan dagiti kakailian ken dagiti turista a sumrek ditoy probinsia babaen iti pannakaipababa ti bayad iti Rapid Antigen Test nga iyuswat dagiti laboratorio nga adda kadagiti border ti probinsia.

Inlawlawag na a dagiti kakailian wenno turista nga agtalinaed iti dua a rabii ket tallo gasut ti pagbayad ti tunggal maysa idinto a dagiti saan a residente wenno turista a saan nga agpaot ditoy probinsia ket agbayad ti innem a gasut a pisos.

-- ADVERTISEMENT --

Inpanmanama ti Gobernador nga agtultuloy ti panangmonitor ken panang-evaluate ti gobierno probinsial iti bayad ti Rapid Antigen Test.

Maipalagip nga inrakurak ni Manotoc iti kallabes a kalikagum na a maipababa ti bayad ti Rapid Antigen Test ken nangrugin a naipatungpal idi Oktubre 12.

Mainaig iti daytoy, kuan ni Mr. Ryan Remigio, ti mangidadaulo kadagiti Border Control ditoy Ilocos Norte a limagasut a pisos ti dati a bayad ti Rapid Antigen Test para kadagiti residente ditoy probinsia idinto a walogasut a pisos met para kadagiti saan a residente ditoy probinsia.