LAOAG CITY – Inbatad ni Brgy. Chairman Elmer Lorenzo iti Brgy. Zamboanga ditoy siudad ti Laoag nga agtultuloy ti imbestigasyon iti pannakaibelleng ti dua a natay a pangganakan a baboy iti kapanagan.

Segun ken ni Lorenzo immuna  nakaawat ti report manipod iti concern citizen a kabarangyanna seknan ti naibelleng a baboy.

Kuna na a dagus na nga inyuman daytoyo iti biang ti City Health Office.

Inbatad na a kas pammalakad ti CHO ket naikali dagiti natay a babay ken naiyuswat ti disinfection iti mismo a nakaibellengan dagitoy.

Kabayatanna, kunas Lorenzo a ti nakaibellengan dagiti baboy ket adayo met iti kabalbalayan.

-- Advertisement --

Immunan nga inpakaammo ti kapitan a basar iti inisyal a panagimbestigar da ket nakita ti care taker ti quarry area nga asideg ti nakaibellengan dagiti baboy nga adda ti lugan a truck a napan iti lugar iti oras ti alas tres ti parbangon ken posible a daytoy ti nagibelleng ti baboy.

Inbunannag ni Lorenzo nga iti pannakareview ti CCTV ket pudno nga adda ti truck a nagsubli-subli iti lugar ken daytoy ket kukua met laeng ti kabarangyanda.

Nu pay kasta, kuna ti kapitan a basar iti pannakainnuman da iti maitudtudo a napan nagibelleng ti natay a baboy iti kapanagan ket naiget a naglikudan na daytoy.

Gapu iti daytoy, inbatad na nga agtultuloy ti panagimbetigarda tapno maestablisar ti agtagikua kadagiti baboy.