LAOAG CITY – Nagpositibo iti African Swine Fever (ASF) ti sumagmamano a baboy iti Brgy. 9 ken Brgy. 2 iti ili ti San Nicolas.

Daytoy ti kinumpirmaran ni Dr. Loida Valenzuela, ti provincial veterinarian.

Kuna ni Valenzuela nga adda dagiti natay a baboy kadagiti nadakamat a barangay rason a naalaan ti sample ken naipadalan iti testing.

Inbatad na a maipagarup a naggapo ti virus iti maysa a kameng ti PNP a residente iti Brgy. 9 ken nakadestino iti ili ti Marcos gapu ta sumursurot daytoy kadagiti culling areas.

Mainaig iti daytoy, inpakaammo na a posible met a dagiti baboy manipod iti endemic areas ti namunganayan ti panagpositibo iti ASF dagiti taraken a baboy iti Brgy. 2.

-- Advertisement --

Gapu iti daytoy, nakurang a 30 a baboy ti naisakripisyo a naikali manipod kadagiti urban barangay iti nasao nga ili.

Kabayatanna, kuna ni Valenzuala a dagiti laengen nga adda iti protected zone manipod iti ASF ket iti ili ti Pagudpud ken Currimao.