LAOAG CITY – Problema iti pamilya ti makaigapu a nagpakamatay ti maysa a construction worker, agtawen ti 30, awanan ti asawa ken residente iti Barangay Cavit ditoy ciudad ti Laoag.

Daytoy ti inbatad ni Police Lt. Col. Rafael Lero, ti chief of police ditoy ciudad ti Laoag.

Inbaga ni Lero a basar iti imbestigasyon da ket maipagarop a saan a maawat ti biktima ti pannakatay ti ama na rason a nadepress daytoy ken masansan ti panagbartek na.

Immunan nga inpakaammo ni Barangay Chairman Jerry Alonzo iti Barangay Cavit ditoy ciudad ti Laoag a masansan a karyaren ti biktima dagiti nagannak ken kakabsat na no mabartek.

Inbaga na nga idi laeng lunes, setyembre 13 ket nagpatulong ti pamilya ti biktima iti PNP gapu ta kinaryar na manen dagitoy no sadinno nga iti panagresponde dagiti otoridad ket kapilitan nga innala da daytoy ken pinaumyan da iti kwerpo ti pulisya.

Nupay kasta, kalpasan laeng ti sumagmamano nga oras sipud nakaawid iti balay da ti biktima ket kinaryar na manen ti pamilya  na ken adda pay ti iggem na a buneng rason a nagpatulong manen dagiti maseknan iti PNP.

Iti panagturong dagiti kameng ti pulisya iti balay ti biktima ket napan da linukatan ti kwarto na ngem ditoy metten a nakita da a nakabitin ken mismo a ni Doctor Joseph Adaya, ti City health Officer ditoy ciudad ti Laoag ti nangideklara a pimmusayen daytoy.