LAOAG CITY – Inbatad ni Atty. Alipio Castillo, ti Provincial Election Supervisor ti Commission on Elections (Comelec) ditoy Ilocos Norte a manarimaan ti pannakaipinal dagiti pagalagadan a masurot para iti panagbubutos iti sumaruno a tawen.

Segun kenni Castillo, adda ti pannakaitantan ti panangipinal dagitoy gapo iti pandemya ken naapektaran amin ti plano ken schedule.

Inlawlawag a naibaga kadakuada nga intono malpas ti panagpipila ti Certificate of Candidacy (CoC) ket mabalin a maiparuk-at ton ti Rules and Regulations para iti Election 2022.

Inpalgak na nga iti maaramid a Rules and Regulations para iti Election 202 ket mailanad dagiti nagduduma a factor kas iti bilang dagiti botante a sumrek iti polling precinct, no mano ti voting machine ti mausar ken ken ti oras ti panagbutos.

Inpetteng na a maysa kadagiti kangrunaan a sagsaganaan ti komisyon ket ti kinatalged dagiti botante ken dagiti agserbi iti kaaldawan ti panagbubutos.

-- Advertisement --

Iti biang met no mano nga aldaw ti eleksyon, kunana a maysa nga aldaw met laeng ngem maikonkonsiderar a maiyalud-od ti oras ken manayunan ti vote counting machine.

Kabayatanna, saan met pay a maipasigurado ni Atty. Castillo no kasano ti panagbutos dagiti indibidual a naka-isolate wenno dagiti positibo iti covid-19, ken daytoy ti manarimaan nga ad-adalen ti Comelec.