ADVERTISEMENT

LAOAG CITY – Manarimaan a maisagsagana ti baro nga atraksion wenno lugar a pangawis kadagiti turista nga umay ditoy Ilocos Norte.

Segun ken ni Provincial Tourism Operations Officer II Mr. Xavier Ruiz, daytoy ket ti “water park” a maiyestablisar iti Paoay Lake iti ili ti Paoay.

Inlawlawagna a gapu ta ti nasao a lugar ket maysa a “protected area” nga imanmanehar ti Protected Area Management Board wenno PAMB ken ti Department of Environment and Natural Resources Office wenno DENR, masapul a maipresentar, maurnos ken maaprobaran ti Eco. Tourism Plan ti Paoay Lake iti Regional Eco. Tourism Committee.

Inbatad ni Ruiz a dakkel daytoy a tulong tapno mapabaro dagiti mabalin nga idiaya ti probinsia iti benneg ti turismo.

Kunana a maitampok ditoy dagiti dadakkel a salbabida a mabalin a pagtarayan, adda ti “obstacle” na, mabalin a pagpaayasan nga agtatapaw iti Paoay Lake.

-- ADVERTISEMENT --

Segun kenkuana a mabalin pay ti nasao a lugar a paglangoyan ket adda pay ti plano a maikabil nga “attraction” iti “beach area” malaksid laeng kadagiti agtatapaw.

Innayonna nga awan met ti nakita a parikut iti kalidad ti danum iti kaudian a pannaka-check ti danum ken paset iti “management plan” ti regular a pannaka-check ti danum ti Paoay Lake.

Kabayatanna, sangkamaysa nga inaprobaran dagiti agpanpanday linteg ti Sangguniang Panlalawigan ti nasao a proyekto ti Provincial Tourism Office.