ADVERTISEMENT

LAOAG CITY – Awan dagiti Pilipino a nairaman iti pannakauram ti 13-storey tower iti ciudad ti Kaphsiung idiay Taiwan.

Daytoy ti inbaga Bombo International News Correspondent Gladys Domingo Apostol, taga Dingras, Ilocos Norte ngem agdama nga agtrabtrabaho idiay Taiwan.

Segun kenkuana, ti nasao a pasdek ket addan 40 a tawen na.

Inlawlawag na a ti nasao a pasdek ket apartment a pagnanaedan dagiti nataengan ken adda rangkap ti bagi na a chinese nationals no sadinno a dagiti agserserbi a caregiver ket Indonesian.

Kabayatanna, inpakaammo met ni Emerlyn Chua manipod iti Saludares iti ili ti Dingras ngem agdama nga agtrabtrabaho idiay Taiwan sipud idi 1997 a saan laeng a pagnanaedan dagiti nataengan ken adda ti rangkap ti bagi na ti nauram a pasdek no di ket commercial site pay daytoy.

-- ADVERTISEMENT --

Kuna na nga adda ti commercial site iti baba no sadinno a ditoy pay ti ayan dagiti babassit a klinika.

Mamati ni Chua a nairanta a nauram ti pasdek gapu ta adda ti uppat nga indibidual a tiniliw dagiti otoridad a mapagduduwaan ti tignay na iti lugar.

Immunan a naireport nga umabot iti agarop 46 a tattao ti natay idinto a dinosdosena a sabsabali dagiti nasugatan iti pannakauram ti 13-storey tower iti ciudad ti Kaphsiung idiay Taiwan.

Iti report ti Fire Department, 79 a tattao dagiti  naitaray iti ospital no sadinno a 14 kadagitoy ket adda iti kritikal a kondisyon.