ADVERTISEMENT

LAOAG CITY – Saan a napaboran ti appointment ni Mrs. Perlita Cabello kas mangidaulo iti City Social Welfare and Development (CSWD) ditoy ciudad ti Laoag.

Daytoy ket gapu ta tallo laeng dagiti kameng ti konseho a pimmabor a dagitoy ket isuda Konsehal Edison, Konsehal Jastine Chua ken ni Konsehal Juan Conrado Respicio.

Saan met a pimmabor da Konsehal Derick Lao ken Konsehal Edison Bonoan idinto a nag-abstain da Konsehal Jason Perera, Handy Lao, JB Baquiran ken ni Kosehal RJ FariƱas.

Immuna iti daytoy, nagsaludsud ni Vice Mayor Vicentito Lazo ken ni Cabello no addan ti nagsungbat wenno nakasoan mainaig ti kaadda dagiti saan a naibunong a food packs idi 2020.

Malaksid iti daytoy, adda pay dagiti naduktalan nga expired nga agas ken makan kas noodles, kape ken dadduma a nakita iti opisina ti CSWD ken dagiti dadduma ket naikabil iti Engineering Office iti Barangay 1 ditoy ciudad ti Laoag.

-- ADVERTISEMENT --

Insungbat ni Cabello a naiyisoan ti memorandum ti incharge para kadagiti nasao nga items ken nagsungbat iti opisina ni Mayor Michael Marcos-Keon.

Innayon ni Cabello a saan a naikoordinar kenkuana dagiti items a dandanin ag-expired ngem saan latta nga inawat dagiti sumagmamano a kameng ti konseho ti nagbalin a palawag na.

Iti pannakasarita dagiti kameng ti media ken ni Cabello kalpasan a saan a naaprubaran ti appointment na a mangidaulo iti CSWD ket naibaga na a kayat nan ti agretiro.

Kabayatanna, naan-anay metten a naaprubaran ti appointment ni Engr. Shiela Opelac kas mangidaulo iti City Agriculture Office ditoy ciudad.