ADVERTISEMENT

LAOAG CITY – Ado dagiti nagturong iti opisina ti Commission on Elections (Comelec) ditoy ciudad ti Laoag para iti ummuna nga aldaw iti panagtultuloy ti voter registration.

Segun kenni Atty. Julius Balbas, ti Election Officer ditoy ciudad ti Laoag, karaman kadagiti transaksyon dagiti nagturong iti opisina ket agrehistro ken agtransfer iti lugar a pagbutusan, ken agpa-update ti rekord na iti comelec.

Inbatad na nga iti ummuna nga or-oras, kaadoan kadagiti residente a nagturong iti Comelec office ket agtransfer iti sabali a barangay gapo iti rason a nabayag dan nga agnanaed iti ayan da a lugar.

Inlawlawag na a kadagiti agpaiyakar ti barangay a pagbutusan ket masapol a maabot da ti requirement kas iti innem a bulan a panagtalinaed wenno six months residency.

Kabayatanna, gutgutiguten ni Balbas dagiti saan pay a nakarehistro nga agturong dan iti opisina manipud Lunes agingga iti Sabado iti oras ti alas-otsoiti bigat agingga iti alas-singko ti malem, mangrugi ita nga aldaw Hulyo 4 agingga iti Hulyo 23.

-- ADVERTISEMENT --

Inpetteng na a daytoy laeng ti naited a registration period para iti posible nga SK ken Barangay Elections intono Disyembre.