ADVERTISEMENT

LAOAG CITY – Kinumpirmaran ni Engr. Ma. Venus Torio iti First Engineering District ti Dept. of Public Works and Highways (DPWH) nga adda dagiti proyekto ti ahensya nga awan pay ti naited a pondo.

Segun kenni Torio, ita a tawen ket addaan ti 28 a proyekto ti 1st District ngem uppat pay laeng kadagitoy ti naiparuk-atan ti pondo nga umbaot iti 28 a milyon a pisos.

Kunana a dagiti nabatbati a 24 a proyekto ket addaan ti pondo a nasurok maysa a bilyon a pisos ngem adda iti babaen ti For Release Later (FRL).

Inbatad na a basar iti kapadasan da itay napan a tawen 2020, mabalin a manipud dua agingga iti innem a bulan wenno makatawen ti urayen da sakbay a maiparuk-at ti pondo.

Inlawlawag na nga iti laksid a prayoridad ti Build, Build, Build Program, maawatan da ti panakaitantan ti pondo gapo iti mapaspasaran a pandemya.

-- ADVERTISEMENT --

Mainaig iti daytoy, iti laksid nga adda ti FLR ket mabalin da met latta ti ag-bid iti proyekto uray awan pay ti pondo na laketdi adda iti General Appropriations Act (GAA) ken no mairuar ti pondo ket mai-award a dagus tapno saan a maitantan ti proyekto.

Inpalgak na nga iti laksid daytoy ket saan met pay a napasamak ti saan a pannakaiparuk-at ti pondo.