KORONADAL CITY – Mas ginpahugtan pa sang 6th Infantry Division sang Philippine Army ang ila seguridad kag pagbantay kasunod sang pag-atake sang mga terror groups sa mga detachment sini.

Base sa impormasyon nga nakuha sang Bombo Radyo Koronadal, nagluntad ang nasambit nga pagpang-harrass sa mga detachment sang nakaligad nga semana sa 38th Infantry Battalion kun sa diin ginbombahan sang 40mm rounds ang ila kampo takna alas 7:40 sang gab-I.

Makaligad ang duha ka oras, ginpalukpan sang M203 grenade launchers kag pinaulanan sang bala ang Darping Detachment sa Brgy. Kalanganan 1, Cotabato City nga nagdugay sang pila ka minuto.

Wala naman sang may napilasan nga mga suldado sa nasambit nga pag-atake.

Samtang ginpasiguro naman ni 6th ID Commander Major General Diosdado Carreon nga pagalagson ang mga yara sa likod sang nasambit nga pag-atake.

Gindayaw man sini ang pagka-mabantayon sang mga tropa sa nasambit nga pag-atake.