SURALLAH, SOUTH COTABATO – Nagsungka na ang suspek nga nagpamuno-patay sa tatlo ka miyembro sang pamilya Calibayan sa bahin sang Prk. Lambokon, Brgy. Canajay, Surallah, South Cotabato.

Sa interbyu sang Bombo Radyo Koronadal kay Surallah chief of police Major Marifel Maganto, nagsungka sa isa ka barangay kagawad sa Brgy. Colonggulo ang responsable sa krimen nga si John Jobert Dunis, 31 anyos.

Ginpasiguro naman sini ang gilayon nga pagsang-at sang nagakaigo nga kaso batok sa nasambit nga suspek.

Una sini, ginbuno sang suspek ang mga biktima nga sanday Benedicto Calibayan, 53; asawa sini nga si Japellina, 51 anyos kag ang ila bata nga si Victoria, 15 anyos kag isa ka estudyante.

Bangud sa sobra nga kaakig sang suspek nga si John Jobert Dunis, 31 anyos nahimo sini ang brutal nga pagpatay sa mga biktima usar ang gunting.

Gin-ako mismo sang suspek nga nagpalanulom ini sa kaakig rason nga nahimo ang krimen.

Ginasiling nga indi man ini luyag nga magpadulong sa Iraq ang iya asawa kag masami suno pa nila ini nga ginabaisan dugang pa ang iya pagpati nga ginaguba siya sang iya mga ugangan sa iya asawa nga yara sa Metro Manila.

Nahibaluan nga may kaso na nga daan sang pagpamuno sa iban nga lugar ang suspek.